富咸再收「廠員」　有望平簽辛真高

上季喺阿仙奴失寵嘅烏克蘭國腳辛真高，據報獲另一倫敦球會富咸垂青，呢位28歲球星依家只剩1年合約，富咸有望用1,000萬鎊「超抵價」完成交易。

據英國《太陽報》報道，辛真高已被阿仙奴掛牌出售，由於佢只剩1年合約，而且15萬鎊周薪唔係咁易搵到買家接手，所以願意以低至1,000萬鎊放人。 消息人士向《太陽報》透露：「富咸視辛真高為主要目標，佢幾乎肯定會喺夏天離開阿仙奴，唔少球會都注視緊。」

早前有傳AC米蘭、多蒙特都對佢有意，但富咸嘅加入即時成為熱門，富咸近年特別鍾意喺阿仙奴「執貨」，賓特尼奴、伊禾比、韋利安、伊美路維都係前阿仙奴球員，上季又向阿仙奴借用賴斯尼爾遜，關係非常友好。