摩連奴出手拯救　辛祖願意加盟費倫巴治

曼聯「貴價水貨」查頓辛祖前途問題有重大突破，根據英國《太陽報》爆料，由前紅魔鬼主帥摩連奴執教嘅費倫巴治提出收購呢位25歲英格蘭翼鋒，並為佢提供一份同現時「實質薪酬」相若合約，據悉辛祖亦願意轉戰土超，追隨「寸王」搵食。

查頓辛祖4年前以7,300萬鎊(約7.8億港元)轉會費由多蒙特加盟曼聯後，一直踢唔出應有身價，前季曾被外借返多蒙特半季，剛過去球季被外借去車路士，並於歐協聯決賽入波，協助車仔奪得冠軍。

不過，呢支倫敦勁旅寧願賠償500萬鎊畀曼聯，都唔肯根據借用條款以2,500萬鎊買斷辛祖。紅魔鬼領隊魯賓艾摩廉亦表明，隊內已經冇辛祖嘅位置，要求佢另找出路，費倫巴治今次提出簽入查頓辛祖，對於呢位落難球星，無疑係一場及時雨。

由於查頓辛祖僅剩下1年合約，費倫巴治只肯以「低價」1,500萬鎊轉會費收購佢，並向佢提供一份1,000萬鎊年薪嘅3年合約，換言之周薪大約為19萬鎊，雖然遠低於佢效力曼聯嘅30萬鎊周薪，但由於土耳其稅率比英國低，辛祖獲得「實質薪酬」，並唔低得過現時人工太多。

加上摩連奴非常欣賞查頓辛祖，並會為佢制定「事業規劃」，只要佢加盟，應該可以穩坐正選，有望拯救球員生涯，辛祖基本上願意轉投費倫巴治，現時主要等兩間球會傾掂轉會費條款，就可以成事。

前曼聯中場費特2年前加盟費倫巴治後，獲得重用，有呢個成功例子，可進一步增加查頓辛祖轉戰土超嘅信心。