拜仁派副選「讓賽」不敵賓菲加　失小組首名

周三(25日)凌晨世冠盃C組，賽前2戰2勝已穩奪出線權嘅拜仁慕尼黑，今仗正選陣容收起多位主力之下，以0比1不敵賓菲加，被呢支葡超球隊搶走小組首名。拜仁將於16強遇上D組首名法林明高，似乎主帥高柏尼比較想鬥南美洲球隊。

拜仁慕尼黑射手哈利卡尼、翼鋒米高奧利斯、中場穆斯亞拿、後衞甘美治等多位主力，都擔任後備。仍然要搶分爭出線嘅賓菲加乘虛而入，開賽13分鐘，由21歲新星舒積達路射入，迅速打開紀錄。賓菲加上半場4次射門3次中目標，反觀拜仁4次射門都唔中目標，上半場只落後1球，已經算好彩。

換邊之後，拜仁教高柏尼立即作出3個調動，換入哈利卡尼、米高奧利斯、甘美治救亡，搶番唔少攻勢，但始終未能扳平。賽後拜仁老將湯馬士梅拿表示，球隊下半場踢得非常有侵略性，令對手疲於奔命，但射門把握力欠佳，起碼應該值得和波，對於只能次名出線感到失望。

值得一提，拜仁慕尼黑繼上場對小保加，有63,587位觀眾入場，成為今屆首場滿座比賽之後，今場再有超過74,000位球迷捧場，可見拜仁相當有賣座力。