【有片】利物浦神兵轟2球 英格蘭再闖U21歐國盃決賽
英格蘭U21衞冕歐國盃只差1步！周四(26日)凌晨U21歐國盃4強大戰，英格蘭U21憑利物浦中場哈維艾利洛連轟兩球，2比1淘汰荷蘭U21殺入決賽，連續第2屆躋身呢項賽事決賽，將會同德國U21爭奪冠軍，期望成為2013年後首次成功衞冕嘅球隊。
星光熠熠嘅英格蘭U21上半場同荷蘭U21踢成均勢，雙方都冇太多埋門機會，換邊後兩隊加快節奏，62分鐘哈維艾利洛右路高速推入禁區，窄角度勁射掛網。荷蘭U21喺10分鐘後由奧希路40碼遠射追平，眼見法定時間就完結，哈維艾利洛86分鐘再次中場發難，如入無人之境下抽射入網，帶領英格蘭U21殺入決賽。
22歲嘅哈維艾利洛上季喺利物浦上陣唔多，但落場都有突出表現，獲選為今場MVP嘅佢賽後表示：「上季見到沙拿同雲迪積克入咗好多重要入球，我認為佢哋做嘅嘢、唔放棄嘅精神，就係領導力。我要喺關鍵時刻挺身而出，好開心可以貢獻兩個入球幫助球隊贏波。」
英格蘭U21決賽嘅對手將會係德國U21，德國U21周四以3比0大破法國U21入決賽，星級前鋒禾達美迪又有波入，係佢今屆第6個入球，決賽勢必成為英格蘭U21心腹大患。對於決賽，英格蘭領隊卡斯利表示：「我哋有好高質素，但更重要係我哋有自信，我哋唔係『希望』捧盃，而有『自信』有能力完成最後同最困難呢一步。」