曼城復活狂炒祖雲達斯　夏蘭特入生涯300球

周五(27日)凌晨世冠盃G組，回復霸氣嘅曼城大發神威，5比2大炒意甲勁旅祖雲達斯，3戰全勝以首名出線，亦係今屆唯一全勝兼入波最多球隊。挪威前鋒艾寧夏蘭特今場攻入生涯300球，而且用嘅場數遠少於美斯、C朗拿度同基利安麥巴比，名留青史。

上季經歷「4大皆空」嘅曼城，喺世冠盃愈戰愈勇，今場完全輾壓祖雲達斯，謝利美杜古9分鐘先開紀錄，古普美拿斯2分鐘後閃電為祖記追平，但皮爾卡魯魯26分鐘擺烏龍，令曼城半場領先2比1。換邊後曼城大開殺戒，艾寧夏蘭特、菲爾科頓同沙雲奴各入1球，祖記尾段由杜辛華荷域追番1粒，曼城最終大勝5比2。

曼城係今屆世冠盃唯一3戰全勝球隊，13個入波亦係各隊之冠，領隊哥迪奧拿賽後指曼城逐漸回復舊觀：「我好鍾意今場表現，我哋擊敗咗一支強隊。好耐冇見過呢種演出，球員再次感受到一支勁旅應該係點，好開心佢哋明白到自己需要做咩，先可以令曼城重拾過去10年嘅輝煌。」

艾寧夏蘭特今場後備上陣入波，係佢職業生涯第300球。據《ESPN》統計，艾寧夏蘭特只係踢370場就入300球，效率遠勝基利安麥巴比(409場)、美斯(418場)同C朗拿度(554場)。艾寧夏蘭特嘅入波分別嚟自曼城(123球)、多蒙特(86球)、挪威(42球)、薩爾斯堡(29球)同莫迪(20球)。