【官宣】利物浦簽卻基斯　1個月狂花2億鎊

英超霸主利物浦今夏瘋狂擴軍，周四(26日)宣布由般尼茅夫簽入匈牙利左閘米路斯卻基斯，轉會費為4,000萬鎊。連埋呢單收購，利物浦1個月內花費接近2億鎊買人，而且之後可能陸續有來！

現年21歲嘅卻基斯上季成功上位，英超踢足38場有2個入波同5次助攻，今次同利物浦簽約5年。卻基斯表示：「李察曉士(利物浦總監)之前將我帶去般尼茅夫，佢係今次轉會重要原因，領隊施洛亦向我解釋過佢嘅戰術、計劃同期望，我一直決心加盟利物浦，從來冇考慮其他球隊。」

利物浦今月已簽入謝利美費林邦(2,950萬鎊)、柏斯(150萬鎊)、科利安華迪斯(1.165億鎊)同米路斯卻基斯(4,000萬鎊)，轉會花費接近2億鎊，如果計埋上年已落實加盟，今夏正式歸隊嘅門將馬馬達舒維利(2,900萬鎊)，新兵總值突破2.1億鎊。消息指利物浦仲未夠喉，有望再簽中堅馬克古希，而前鋒亦瞄準阿歷山大伊沙克、伊基迪迪、約基利斯同域陀奧森漢等貴價前鋒。