【有片】奧拿拿改踢前鋒 網民讚「有用過海倫」
曼聯門將奧拿拿前途未卜，佢喺暑假期間返鄉下度假，日前更同好友一齊參加一場街頭賽事，比賽入面奧拿拿竟然擔任中鋒，佢嘅「柱躉式」踢法身位一流，唔少網民睇完都話：「有用過海倫！」
網上流出影片入面，奧拿拿喺家鄉一場街頭賽事踢中鋒，經常擔位用背脊壓住對手停波，雖然場地環境惡劣，但呢位喀麥隆國腳仍然功架十足，網民紛紛留言：「有用過海倫」、「曼聯搵到新前鋒」，但亦有球迷抽水話：「連街波球隊都唔想搵奧拿拿守龍門」。
奧拿拿早前喺非洲出席慈善活動，唔肯對去留作出回應，傳聞法甲勁旅摩納哥對佢虎視眈眈，而曼聯亦有意收購阿士東維拉門將達米安馬天尼斯，奧拿拿留喺曼聯機會並唔樂觀。