利物浦繼續瘋狂掃貨　天價搶購伊沙克

英超冠軍利物浦成為今夏出手最闊綽球會，繼以破英超轉會費紀錄1.165億鎊(約12.6億港元)收購利華古遜中場科利安華迪斯之後，準備再以天價掃貨。根據英國《太陽報》爆料，紅軍下一個目標係紐卡素射手阿歷山大伊沙克，估計呢位25歲瑞典國腳身價達1.5億鎊(約16億港元)。

由於利物浦前鋒達雲紐尼斯好可能轉投拿玻里，將冇晒正宗中鋒，有必要填補空缺，首選阿歷山大伊沙克。呢位身高1米92嘅神鋒3年前以6,300萬鎊轉會費由皇家蘇斯達加盟紐卡素，表現愈來愈好，上季踢出顛峰水平，為「喜鵲」上陣42場入27球及6次助攻，包括以23個聯賽入波，排英超射手榜第2位，僅次於入29球嘅穆罕默德沙拿，如果利物浦簽到伊沙克，意味同時擁有2位英超最佳射手。

《利物浦回聲報》指過咗6月30日之後，紅軍嘅英超「可持續財政規例」將重新計數，令會方有足夠財政空間大肆增兵，願意重金收購阿歷山大伊沙克。

不過，紐卡素財大氣粗，準備向阿歷山大伊沙克提供一份球會史上最高薪合約綁實佢。伊沙克仲有3年合約，現時周薪為12萬鎊，如果佢續約，估計人工會倍增。

利物浦亦有「B計劃」，一旦未能簽入阿歷山大伊沙克，就會改為收購法蘭克福前鋒伊基迪基，或者白禮頓前鋒祖奧柏度，甚至可能同阿仙奴、曼聯爭奪士砵亭射手約基利斯。