【官宣】紅軍第5簽　英冠門將免費加盟

利物浦增兵一浪接一浪，會方宣布英冠球隊普雷斯頓門將費迪活特文，將於7月1日以自由身加盟，成為紅軍今夏第5位新兵。

現身28歲嘅費迪活特文出身紐卡素青訓系統，但升上一隊之後，絕大部分時間被外借，2022年正式轉投普雷斯頓，並一直擔任正選，總共上陣138場，曾於2022/23年球季當選隊內最佳球員。

費迪活特文將於6月30日約滿離開普雷斯頓，並已經同利物浦達成協議，7月1日正式加盟。由於利物浦正選門將仍然係艾利臣比加，加上上年向華倫西亞「預購」嘅馬馬達舒維利亦將於今夏正式來投，估計費迪活特文只能擔任第3號門將。

利物浦今月已簽入謝利美費林邦(2,950萬鎊)、柏斯(150萬鎊)、科利安華迪斯(1.165億鎊)及米路斯卻基斯(4,000萬鎊)，總轉會費接近2億鎊，費迪活特文成為唯一「免費品」。