38歲基奧特重返歐洲　同里爾簽約1年

法國著名射手基奧特去美職搵食1年之後，即將重返歐洲球壇，根據「轉會權威」記者羅曼諾(Fabrizio Romano)爆料，呢位38歲老將已經同意加盟法甲球隊里爾，雙方將會簽約1年。

基奧特曾經效力阿仙奴、車路士等球隊，上年夏天離開AC米蘭，加盟美職球隊FC洛杉磯，各項賽事上陣37場僅入5球，表現令人失望。基奧特早前有份為FC洛杉磯踢世冠盃，但分組賽出局，亦成為佢嘅告別戰，並迅速同里爾達成加盟協議，只要通過體測，就會簽約1年，意味佢可能喺里爾踢到掛靴。

基奧特屬於法國國家隊史上最多入波球員，達到57球，佢出道初期，曾協助蒙彼利埃爆冷奪得2011/12年球季法甲冠軍，並成為該季聯賽神射手，打出名堂，隨即被阿仙奴收購，基奧特相隔13年再戰法甲，表現令人期待。