最佳38歲生日禮物　「母會」看台以美斯命名

國際邁亞密球王美斯剛過去周二(24日)度過38歲生日，「母會」紐維爾舊生送上一份厚禮，將主場其中一個看台以呢位阿根廷國腳命名，向佢作出最崇高致敬。

美斯曾於1995至2000年喺紐維爾舊生青年軍受訓，其後被巴塞隆拿簽入，雖然美斯從未為呢支阿甲球隊上陣，但會方仍然以「栽培」出球王為榮，近日將其一邊龍門後面嘅看台，以美斯命名，並油上傳統主場球衣紅黑色，加上美斯招牌10號及姓名。

不過，此舉引來唔少紐維爾舊生球迷不滿，認為美斯未效力過一隊，憑乜可以獲得看台命名，亦有人指會方叨美斯光，令人尷尬。

美斯曾於2017年講過，有意重返紐維爾舊生踢到掛靴，會方今次以佢命名看台，可以想進一步吸引佢回巢。

另外，前曼聯隊長堅尼近日去到國際邁亞密探班，同蘇亞雷斯、希斯基斯、佐迪艾巴合照，唯獨見唔到美斯，網民寸呢位昔日英超硬漢應該好失望。