英格蘭戲劇性衞冕U21歐國盃　艾利洛成大贏家

周日(29日)凌晨U21歐國盃決賽，英格蘭U21同德國U21法定時間激戰打成2比2，加時戰憑莊拿芬路維入波，戲劇性贏3比2勇奪冠軍，亦係12年來首支成功衞冕嘅球隊。效力利物浦嘅哈維艾利洛今場又入波，並獲選為賽事最佳球員(MVP)，有望重踏多位巨星嘅成功軌迹。

英格蘭U21氣勢強勁，弗爆嘅哈維艾利洛開波5分鐘就先拔頭籌，奧馬利赫捷臣24分鐘遠射得手，幫英格蘭U21領先到2比0。不過德國U21亦唔示弱，完半場前由尼爾遜韋柏追番1粒，61分鐘保羅尼比更扳平2比2。加時階段英格蘭變陣，入替1分鐘嘅莊拿芬路維接應傳中頂入，餘下時間堅守城池，最終贏3比2奪得冠軍。

哈維艾利洛喺3場淘汰賽都入波，賽後獲選為今屆賽事MVP，亦係繼希利(1984年)同安東尼哥頓(2023年)，第3個獲得呢個獎嘅英格蘭球員。唔少傳奇球星都係拎U21歐國盃MVP後踏上青雲路，包括禾拉、白蘭斯、蘇加、費高、簡拿華路、派路、施治等等。

22歲嘅哈維艾利洛上屆亦係英格蘭U21奪冠成員之一，今屆以5個入球排射手榜第2位，佢喺U21已累積14個入波，超越舒利亞同謝菲斯(各13球)喺U21嘅入球數字，排英格蘭史上第2位，僅次於入16球嘅尼基迪亞。

U21歐國盃近10屆MVP

2025 哈維艾利洛(英格蘭)

2023 安東尼哥頓(英格蘭)

2021 法比奧韋拉(葡萄牙)

2019 法比安彭拿(西班牙)

2017 丹尼施巴路斯(西班牙)

2015 威廉卡維奴(葡萄牙)

2013 堤亞高艾簡達拿(西班牙)

2011 桑馬達(西班牙)

2009 馬古斯貝治(瑞典)

2007 德倫特(荷蘭)