4戰入4球　37歲迪馬利亞光榮告別

賓菲加喺世冠盃16強加時踢少1人之下，以1比4大敗於車路士腳下，黯然出局，亦成為迪馬利亞告別戰，呢位37歲老將踢足120分鐘，包括補時射入1球12碼，今屆踢4場有4球進帳，排射手榜第1位，可以話係搏盡無悔，光榮結束18年歐洲搵食生涯，將重返阿根廷母會羅沙里奧中央。

迪馬利亞兩年前離開祖雲達斯，回巢成名地賓菲加後，仍然保持高水平發揮，包括世冠盃在內，今季為呢支葡超勁旅上陣44場入19球及10次助攻。最難得係呢位綽號「天使」嘅翼鋒即使已年屆退役年齡，加上美國天氣炎熱，但佢喺今屆世冠盃4場都擔任正選，其中2仗踢足全場，體力及鬥志不亞於年輕球員，就算賓菲加16強止步，迪馬利亞仍然贏盡掌聲。

迪馬利亞5月底已落實踢完世冠盃後，就會以自由身離隊，加盟羅沙里奧中央，以佢現時勇態及身體質素，應付阿甲綽綽有餘。羅沙里奧中央今季成績出色，有埋迪馬利亞幫手，進一步增加奪冠機會。