「新尼馬」率彭美拉斯入8強　車仔提早驗貨

世冠盃16強「巴西內訌」，彭美拉斯加時以1比0擊敗保地花高，打入8強，意味將於今夏正式加盟車路士嘅「新尼馬」艾斯迪華奧，將會鬥未來老細，車仔領隊馬利斯卡亦可以趁機提早「驗貨」。

兩隊勢均力敵，法定時間打和0比0，需要加時決勝負，最終彭美拉斯由保連奴攻入全場唯一入球。雙方踢法粗野，全場有12張黃牌，彭美拉斯中堅古斯達禾高美斯喺加時「兩黃變一紅」被逐，8強需要停賽，無緣對車路士。

彭美拉斯新星艾斯迪華奧今仗正選上陣踢咗63分鐘，呢位18歲翼鋒被譽為自從尼馬之後，最天才橫溢嘅巴西球員，車路士上年6月斥資3,400萬歐元(約3.1億港元)「預購」佢，等世冠盃結束後，就會正式上「車」。

彭美拉斯8強對車路士，正係艾斯迪華奧向未來老細，展示實力最佳機會，必須使出渾身解數，博取馬利斯卡歡心，爭取新一季成為車路士主力。