無處容身　迪姆華拿或轉戰美職

熱刺前鋒迪姆華拿借用期今夏屆滿之後，本應返回RB萊比錫，但呢支德甲勁旅無意收回佢，根據「轉會權威」記者羅曼諾(Fabrizio Romano)爆料，迪姆華拿可能去美職搵食，轉投RB萊比錫同集團「姐妹球隊」紐約紅牛。

迪姆華拿自從5年前由RB萊比錫轉投車路士後，由「神鋒」變成「人球」，先係被車仔賣番畀RB萊比錫，但事業仍然冇起色，上年1月又重返英超，外借去熱刺。呢位德國國腳近1年半為熱刺上陣41場僅入3球，被退貨並唔令人意外，最悲哀係RB萊比錫亦都放棄佢。

迪姆華拿都有自知之明，已經準備去美職搵食，只要同紐約紅牛傾好薪酬待遇條款，就會簽約加盟。紐約紅牛教練辛祖舒華斯都係德國人，應該可以幫助迪姆華拿融入球隊。