曼聯將第三度報價　力爭7.7前簽入麥比奧莫

曼聯日前第二度報價，提出以5,500萬鎊(約5.9億港元)固定轉會費，加上750萬鎊浮動轉會費，收購賓福特前鋒麥比奧莫，但仍然被賓福特拒絕。英國傳媒指，紅魔鬼將會第三度報價，爭取7月7日前簽入呢位25歲喀麥隆國腳。

曼聯早前以6,250萬鎊收購狼隊前鋒馬菲奧斯根夏，賓福特方面認為麥比奧莫身價唔應該低過呢位巴西國腳，所以要求6,500萬鎊(約7億港元)轉會費先至放人。

紅魔鬼之前提出嘅固定加浮動轉會費，合共達到6,250萬鎊，其實已經非常接近賓福特要求，相信只要加多250萬鎊，並提高固定轉會費比例，就可以令賓福特同意出售麥比奧莫。曼聯領隊魯賓艾摩廉希望7月7日前簽入麥比奧莫，以便備戰新球季。

麥比奧莫上季英超上陣38場入20球及8次助攻，熱刺亦計劃收購佢，但麥比奧莫表明首選加盟曼聯，估計成「魔」機會樂觀。