陣前賣人！多蒙特翼鋒即將上車

將出戰世冠盃16強嘅多蒙特陣前賣人，翼鋒比諾傑坦斯於比賽期間同車路士斟掂轉會，據報轉會費為6,500萬歐元(約5.98億港元)，16強對蒙特雷唔會上陣。

20歲嘅比諾傑坦斯曾經係車路士青訓成員，之後又轉到曼城青訓系統，2020年改投多蒙特青年軍，2022年升上一隊出道，4季上陣107場入17球，曾協助英格蘭U19贏得歐洲賽冠軍，今次世冠盃有隨隊到美國，分組賽首場對富明尼斯後備上陣。

德國傳媒報道，多蒙特喺世冠盃期間同車路士進行轉會談判，同時又有拜仁慕尼黑介入，不過最終同車路士交易大致完成，比諾傑坦斯已離開多蒙特大營，向車路士報到進行身體檢查。

今次轉會，比諾傑坦斯算係榮歸車路士，但身價今時唔同往日，轉會費連同浮動獎金，總值6,500萬歐元，車路士更承諾予以重用，前途一片光明。