摩連奴真正目標係杜蘭　辛祖又成棄子

早前傳出費倫巴治教練摩連奴計劃簽入曼聯翼鋒查頓辛祖，但冇晒下文，原來「寸王」真正目標係艾納斯射手祖漢杜蘭，根據「轉會權威」記者羅曼諾(Fabrizio Romano)爆料，費倫巴治周日(29日)談判取得突破，好大機會簽入呢位21歲哥倫比亞國腳。

祖漢杜蘭剛於今年1月底由阿士東維拉加盟艾納斯，轉會費高達6,400萬鎊(約6.9億港元)，雖然呢位新星表現不俗，為艾納斯上陣18場入12球，但佢一直唔適應沙特阿拉伯生活，希望離隊重返歐洲，引來唔少大球會關注。土耳其勁旅費倫巴治因為射手迪斯高離隊，轉投費倫天拿，急需要簽入前鋒，趁機招攬祖漢杜蘭。

據悉雙方正在討論合約細節，並取得重大進展，費倫巴治願意向祖漢杜蘭提供1,000萬歐元(約9,200萬港元)年薪，雖然只及佢效力艾納斯一半人工，但為咗離開沙特，都不惜賺少啲。艾納斯亦唔想勉強留住祖漢杜蘭，只要傾掂轉會費，就會放人。