皇馬新星極速上位　加速踢走洛迪高

皇馬參加今屆世冠盃有意外收穫，21歲前鋒干沙路加西亞演出非常搶鏡，上陣3場射入2球及1次助攻，被指有昔日名宿魯爾影子，極速上位成為新帥沙比阿朗素愛將，可能令會方下定決心出售有離心嘅射手洛迪高高斯。

神鋒基利安麥巴比因為患腸胃炎，缺陣3場分組賽，沙比阿朗素出人意表3場都用干沙路加西亞擔任正選中鋒。呢位西班牙新星不負所托3戰都有貢獻，首仗立即入波，跟住對帕丘卡作出助攻，上仗再入1球，效率極高，難怪唔少球迷建議「麥總」繼續休息，重用干沙路加西亞，捧盃機會可能更高。

干沙路加西亞剛去球季為皇馬B隊上陣36場入25球及4次助攻，早已具備踢一隊實力，而且可以勝任中鋒、翼鋒、第2前鋒，技術非常全面，自然深得沙比阿朗素歡心。

反觀洛迪高高斯一直對於未能出任自己最喜歡嘅左翼耿耿於懷，甚至因而想離隊。隨住干沙路加西亞冒起，皇馬鋒線有人滿之患，可以放心出售洛迪高高斯，近期已傳出阿仙奴有意收購呢位24歲巴西國腳。