坦哈格連簽2人　幾日fing走7億

坦哈格執教曼聯時期，簽人可謂洗腳唔抹腳，買人開支超過6億鎊，佢嚟到利華古遜一樣唔客氣，據報近日一口氣簽入中場馬歷添文同查洛爾昆沙，轉會費總計為8,000萬歐元(約7.36億港元)。

沙比阿朗素離開利華古遜後，坦哈格獲邀出山接手，球隊進入新時代，今夏先後出售多名主力，包括謝利美費林邦同科利安華迪斯等人，獲得轉會費共1.9億歐元，點知坦哈格轉個頭已經使咗接近一半。

23歲嘅馬歷添文於拜仁青訓出身，升上一隊後先後外借到格拉斯哥流浪同燕豪芬，今夏被坦哈格睇中，雙方已經達成協議，轉會費總值4,000萬歐元。

22歲中堅查洛爾昆沙在利物浦未獲正選機會，決定離隊尋求新發展，獲坦哈格垂青，轉會費同為4,000萬歐元，但利物浦保留回購權利。