國米輸波爆內訌　隊長發火：邊個唔想踢可以躝！

周二(1日)凌晨世冠盃16強爆大冷，歐聯亞軍國際米蘭以0比2不敵巴西球隊富明尼斯，恥辱性出局，更加爆內訌，首席射手兼隊長拿達路馬天尼斯發火，含沙射影炮轟主將查漢奴古近期鬧離隊，打擊球隊士氣，叫呢位土耳其國腳如果唔想留隊，可以立即執包袱。

國際米蘭由新帥捷禾執教之下，今屆世冠盃表現走晒樣，今仗亦唔例外，開賽3分鐘就失守，防線出現誤會，被富明尼斯前鋒謝文卡奴近門頂入打開紀錄。國米隨即加強攻力，費達歷高迪馬高2次具威脅射門，都被門將法比奧救出。

其後富明尼斯中堅伊拿斯奧奧利華拉曾經頭槌破網，但因為越位「食詐胡」，國米上半場唔使輸多1球，已經算好彩。

戰至83分鐘，國際米蘭獲得黃金機會，拿達路馬天尼斯射門可惜中柱彈出，扳平唔到之餘，更於補時被富明尼斯中場靴古斯射成2比0完場，爆出5.5倍客W，意味今屆世冠盃8強有2支巴西球隊，彭美拉斯及富明尼斯。

國際米蘭大熱倒灶16強止步，拿達路馬天尼斯批評有隊友累事：「我想為爭奪大賽冠軍而戰，邊個想留隊，就一齊努力，邊個想走，你可以離隊，我哋着得呢件重要球衣，必須有最強鬥心，如果冇，請離開。」雖然呢位阿根廷國腳冇開名，但國米會長馬羅塔承認講緊查漢奴古，並會同呢位31歲中場傾轉會問題，願意出售佢。

查漢奴古效力國米4年，因為受傷未曾喺今屆世冠盃上陣，盛傳土耳其勁旅加拉塔沙雷有意收購佢，查漢奴古為返回祖國搵食，要求國米降低轉會費，可見佢去意已決。