老兵不死！富明尼斯「121歲」三劍俠創奇迹

富明尼斯爆冷擊敗國際米蘭，打入世冠盃8強，37歲前鋒謝文卡奴比賽初段迅速入波，固然搶鏡，44歲門將法比奧及40歲中堅堤亞高施華鎮守防線，力保不失亦功不可沒。呢個「121歲」攻守三劍俠組合寶刀未老，令人佩服。

賽前富明尼斯被外界睇淡，因為之前3場分組賽僅1勝2和，當中2場冇波入，唯一勝仗只係贏南韓球隊蔚山HD，但今場對意甲勁旅，表現毫不輸蝕，尤其是3位老將謝文卡奴、堤亞高施華、法比奧有心有力。

阿根廷前鋒謝文卡奴繼對蔚山HD建功之後，今場又入波，至於曾效力AC米蘭、巴黎聖日耳門、車路士等球隊嘅堤亞高施華，再次發揮「國米剋星」本色，近5次上陣對國際米蘭，取得4勝1負。

門將法比奧喺首場分組賽對多蒙特，已創下世冠盃史上最大年齡上陣球員紀錄，佢今仗屢救險球，令國米球員望門興嘆，法比奧今屆踢4場有3場「零封」對手，成為球隊防線定海神針。