莊尼伊雲斯留效曼聯　今次有新任務

曼聯中堅莊尼伊雲斯5月底訪港，為紅魔鬼最後1次上陣後宣布掛靴，但呢位37歲北愛爾蘭名宿並冇真正離隊，現時獲會方安排新崗位，負責青訓工作，希望為球隊發掘更多潛力新星。

莊尼伊雲斯本身都係曼聯青訓產品，2006年出道效力9年後離隊，踢過西布朗及李斯特城，兩年前重返母會。由於莊尼伊雲斯年紀大，加上傷患問題，今季僅為曼聯上陣13場，佢退役後，會方決定挽留呢位人才，輔助總監韋確斯，處理青訓事務，主要為年輕球員尋找更多上陣機會，包括搵其他球會借用，或者推薦畀一隊主帥魯賓艾摩廉。

韋確斯大讚呢位「新同事」：「莊尼係年輕球員嘅完美榜樣，佢嘅比賽經驗非常珍貴，可以幫助小將成長。」唔少網民認為莊尼伊雲斯擁有紅魔鬼DNA，將來隨時有機會成為一隊主帥。