世冠盃爆大冷　曼城遭亞洲球隊踢出局

周二(1日)早上世冠盃16強再次爆大冷，英超豪門曼城領先之下，被沙特阿拉伯球隊希拉爾反超前，「藍月亮」喺法定時間逼和2比2，連1.25倍主W都開唔出，進入加時之後，更加兩度落後，最終輸3比4出局，注定今季四大皆空。

開賽9分鐘，曼城由貝拿度施華入波打開紀錄，以為能夠輕鬆晉級，但換邊後出現大逆轉，希拉爾迅速反攻，經過連續射門後，由馬高斯李安納度頂入扳平。僅過6分鐘，希拉爾打反擊，馬爾甘單刀射入，為球隊反超前。曼城隨即利用角球攻勢，憑艾寧夏蘭特射入追和2比2，法定時間不分勝負，需要加時。

由新帥施蒙尼恩沙基執教嘅希拉爾韌力十足，中堅高列巴尼頂入角球，再次領先，曼城靠菲爾科頓建功又扳平。最後馬高斯李安納度再次發威，近門補射入網，協助希拉爾贏4比3，成為唯一一支打入8強嘅亞洲球隊，將會對巴西球隊富明尼斯。