「細恩」有料！一戰摧毀兩大豪門

希拉爾爆冷淘汰曼城，打入世冠盃8強，新教練施蒙尼恩沙基一戰摧毀兩大歐洲豪門，包括報番2023年歐聯決賽不敵「藍月亮」主帥哥迪奧拿之仇，與此同時，前度執教球隊國際米蘭16強止步，證明呢支意甲勁旅冇咗「細恩」領軍，立即唔掂。

施蒙尼恩沙基曾率領國際米蘭2次打入歐聯決賽，其中2023年0比1輸畀曼城，「細恩」吸取教訓，作出針對性部署，成功報仇擊敗「藍月亮」，曼城隊長貝拿度施華都承認希拉爾踢得好。

至於曼城領隊哥迪奧拿今季領軍61場比賽輸17場，輸波率達28%，創下教波生涯新高，難免令人懷疑呢位西班牙帥已經黔驢技窮。

另外，國際米蘭今屆歐聯決賽0比5大敗於巴黎聖日耳門後，會方唔挽留施蒙尼恩沙基，搵來捷禾執教，結果16強輸畀富明尼斯，國米現時應該知道「細恩」嘅重要性，可惜已經太遲。

值得一提，因為同哥迪奧拿不和，而轉投希拉爾嘅祖奧簡斯路，今仗大踢爭氣波，以表現摑哥帥一巴。