「女C朗」IG有1673萬粉絲　商業價值爆燈

今屆女子歐國盃東道主瑞士雖然歷年來國際賽成績欠佳，但現時隊內擁有「女C朗」莉雯助陣，令球隊備受關注。呢位26歲前鋒唔只球技精湛，並且外表迷人，深受網民歡迎，其社交網帳戶Instagram(IG)擁有1,673萬「追隨者」，屬於女子球員之冠，甚至多過熱刺隊長孫興民(1,447萬)，莉雯商業價值爆燈，有助吸引各大贊助商增加投入，促進女子足球發展。

莉雯7年前去英格蘭發展，加盟韋斯咸女足，2021年轉投阿士東維拉後，人氣進一步上升，被譽最性感女子球員，並同當時維拉男足中場杜格拉斯雷斯拍拖，成為球壇金童玉女，兩人上年夏天一齊轉投祖雲達斯，莉雯協助祖記女足奪得今季聯賽及意盃雙料冠軍。

不過，據悉莉雯同杜格拉斯雷斯近期已經分手，佢現時可以專心為瑞士出戰今屆女子歐國盃，加上屬於多個運動品牌代言人，情場失意之下，可能球場及商場得意。