美斯即將離隊？國際邁亞密咁回應

國際邁亞密喺世冠盃16強出局後，盛傳球王美斯可能離隊，會方發表聲明澄清，指呢位38歲阿根廷國腳會履行現時合約至今年12月底結束，雙方合作關係良好，但外界估計美斯約滿後，未必會續約。

據悉沙特阿拉伯聯賽當局正在積極拉攏美斯加盟，甚至已經同佢嘅爸爸兼經理人佐治展開談判，希望今夏簽入呢位射手，因而傳出美斯即將離隊。國際邁亞密全力挽留，希望佢起碼踢完今季美職再作決定。

事實上，早於2年前，沙特豪門希拉爾已提出以4億歐元(約37億港元)年薪邀請美斯加盟，但佢最終選擇轉投國際邁亞密，球員生涯尾聲會唔會去中東掘金，大家拭目以待。