倫敦雙雄爭奪伊斯　水晶宮面臨被「拆骨」

水晶宮今季捧英足盃，勇奪創會近120年首個大賽冠軍，隊內主力表現出色，成為大球會爭奪目標，繼中堅馬克古希可能轉投利物浦之後，翼鋒伊比爾治伊斯亦成為「倫敦雙雄」阿仙奴、熱刺收購目標，水晶宮今夏面臨被「拆骨」。

英國各大傳媒指阿仙奴主帥阿迪達非常有興趣簽入伊比爾治伊斯，提升新一季爭標實力，呢位27歲英格蘭國腳今季上陣43場入14球及11次助攻，佢仲有2年合約在身，但合約內有6,750萬鎊(約7.3億港元)買斷條款，其他球會可以直接用呢個價錢收購佢，「轉會權威」記者羅曼諾(Fabrizio Romano)指兵工廠近期開始斟介伊比爾治伊斯。

至於今季英超僅排第17位嘅熱刺亦急需要增兵，尤其是下季有份踢歐聯，財政收入有保證，可以放心買人，同樣睇中伊比爾治伊斯。曾於2015至16年執教水晶宮嘅柏杜「助攻」，認為熱刺比較適合伊比爾治伊斯，隨時有機會搶贏阿仙奴。