【有片】皇馬挫祖記入8強 超新星4場入3球極速上位
周三(2日)凌晨世冠盃16強大戰，皇家馬德里1比0擊退祖雲達斯殺入8強，今屆獲沙比阿朗素提拔嘅21歲前鋒干沙路加西亞，今仗繼續有決定性演出，頭槌頂入今屆個人第3球，獲讚係「新魯爾」，而干沙路加西亞正正係傳奇前鋒魯爾嘅得意門生。
皇馬今屆有基利安麥巴比抱恙，佢今場復出亦先任後備，新帥沙比阿朗素寧願棄用洛迪高高斯等球星，大膽提拔青訓前鋒干沙路加西亞擔正。皇馬上半場同祖記踢成均勢，換邊後皇馬加強壓力，64分鐘阿歷山大阿諾特右路傳中，干沙路加西亞銅頭一搖頂入，助皇馬贏1比0晉級8強。
干沙路加西亞之前從未為皇馬正選上陣，但今屆世冠盃獲沙比阿朗素委以重任，4場比賽全數擔正，佢亦交出3個入波同1次助攻。干沙路加西亞上季為皇馬B隊踢西丙，25個入球打破球隊紀錄，教練就係剛離任嘅西班牙傳奇前鋒魯爾。
干沙路加西亞賽後表示：「我同魯爾一直有聯絡，佢每場比賽之後都會有短訊畀我，祝賀我之餘亦會提點我可以點樣改善。魯爾係個傳奇，將我同佢比係我嘅榮幸，但好明顯我同佢仲有好遠距離，過去2年同魯爾合作令我獲益良多。」