【官宣】阿仙奴簽車路士門將　再斟馬杜基

英超勁旅阿仙奴周二(1日)宣布，由車路士簽入「世界最貴門將」阿列沙巴拿加(Kepa)，轉會費只係500萬鎊。阿仙奴近年狂向車路士掃貨，據報佢哋仲睇中英格蘭翼鋒馬杜基，成為夏天鋒線重建其中一塊拼圖。

阿仙奴近期補充兵源，周二正式宣布同阿列沙巴拿加簽約3年，呢位30歲門將喺7年前以7,160萬鎊轉會費加盟車路士，至今仍然係門將最高轉會費紀錄。阿仙奴領隊阿迪達表示：「Kepa有好豐富嘅經驗，隊友會喺佢身上獲益，而且佢非常渴望勝利。」

阿列沙巴拿加將會着13號，預計會係西班牙同胞大衞拉耶嘅副選，Kepa簽約後表示：「同阿迪達傾過後，我睇到呢間球會爭勝嘅雄心......我覺得我哋距離捧盃已經好接近，希望我可以同球隊一齊達成目標。」

阿仙奴近年不斷向車路士「入貨」，據報佢哋今夏仲睇中另一車路士球星馬杜基，消息指阿仙奴計劃引入前鋒、左翼同右翼各1人，前鋒目標已鎖定為約基利斯或施斯高，左翼就睇中洛迪高高斯同伊比爾治伊斯，而右翼目標就直指馬杜基。