拜仁考慮簽拉舒福特　同哈利卡尼拍住上

拉舒福特又有新買家出現！據德國《圖片報》報道，德甲班霸拜仁慕尼黑將收購翼鋒目標，轉移到曼聯棄將拉舒福特身上，因為佢嘅轉會費只4,000萬鎊，拜仁總監艾保爾有信心可以幫「福仔」重生，同哈利卡尼組成英式鋒線。

拜仁依家將注意力放喺收購史特加前鋒禾達美迪身上，不過左翼位置收購就頻頻碰壁，之前斟路易斯迪亞斯、尼高拉斯威廉斯、拉菲爾利亞奧、巴特利巴高拿同加比爾馬天尼利等，全部身價不菲兼困難重重，而反拉舒福特轉會就最易達成。

阿士東維拉已落實唔會「買斷」拉舒福特，曼聯領隊魯賓艾摩廉亦無意再畀機會呢位青訓前鋒，「福仔」離隊只係時間問題，如果佢最終加盟拜仁慕尼黑，仲可以同英格蘭隊友哈利卡尼再度合作，有助佢重上高峰。