車路士再有猛將加盟　「躺着」直入決賽？

今屆世冠盃8強全部誕生，天助車路士，呢支英超豪門位處「天堂戰區」，8強對手只係巴西球隊彭美拉斯，如果打入4強，亦只會遇上富明尼斯或者希拉爾，加上周三（2日）宣布射手祖奧柏度加盟，增強鋒線實力，好可能直通決賽。

車路士之所以有「平坦」衝冠之路，多得早前16強爆冷，2支傳統勁旅曼城、國際米蘭不約而同被淘汰出局，令到「上線區」只有車路士一支歐洲球隊，猶如虎入羊群，晉級決賽機會高唱入雲。

另外，車路士周三（2日）正式宣布，成功收購白禮頓前鋒祖奧柏度，雙方簽約至2032年，估計轉會費達到6,000萬鎊(約6.5億港元)，呢位23歲巴西國腳已飛去美國，向車仔報到。

世冠盃參賽球隊可於6月27日至7月3日重新註冊球員或用新球員取代舊人，因此祖奧柏度趕及加入車路士大軍名單，提升爭標實力。