44歲富明尼斯鋼門　直逼施路頓紀錄

富明尼斯打入世冠盃8強，44歲門將法比奧4場3次零封表現令人驚嘆，連日來國際足協都在社交網大肆吹捧呢位不老傳奇，據統計，佢剛打破意大利鋼門保方嘅零封紀錄，下一目標直指英格蘭名將施路頓上陣紀錄，而且破紀錄只係時間問題。

法比奧係今屆世冠盃最年老球員，國際足協特別為佢發出兩張圖，顯示法比奧相隔28年再度出席國際足協賽事，上次係1997年代表巴西贏得U17世少盃，當年同隊就有「細哨」朗拿甸奴，可見佢輩份之高，隊友中堅40歲嘅堤亞高施華都係佢條「靚」。

雖然法比奧年紀大，但由於從未入選過巴西國家隊，欠缺國際賽數據，所以好多紀錄到現時44歲先打破，例如保方所保持嘅零封紀錄501場，法比奧生涯零封場數已經累積到508場，破紀錄只係最近嘅事。

至於施路頓嘅上陣紀錄，共有兩個版本，一個係1,387場，另一個係1,390場，至於法比奧現時累積上陣1,378場，再踢13場就可以破施路頓紀錄，由於法比奧剛與富明尼斯續約至2026年，所以破紀錄絕無問題。