為轉會去到盡！約基利斯狠飛明星女友表心迹

為轉會可以去到幾盡？瑞典人氣前鋒約基利斯今夏成為搶手貨，早前因士砵亭出爾反爾索取高價而反面，揚言寧願罷踢都唔會再返葡萄牙。當地媒體最新消息，約基利斯為同葡萄牙徹底「斬纜」，竟然狠飛葡國明星女友，據報佢將加盟阿仙奴或曼聯其中一隊，誓要實現踢英超夢想。

近兩季喺士砵亭入近100球嘅約基利斯，上年初同葡萄牙演員兼模特兒恩妮絲(Ines Aguiar)拍拖，被傳媒塑造為金童玉女，不過今夏約基利斯因轉會同士砵亭鬧翻，而恩妮絲早前就喺公開場合向球迷表示，會盡力遊說約基利斯留喺葡萄牙，顯示兩人嘅意見並唔一致。

葡萄牙媒體《TV Guia》爆料，約基利斯喺日前飛去希臘度假前，已同恩妮絲正式分手，事實上佢早前出席士砵亭隊友摩頓曉文特婚禮，恩妮絲已經冇出現。消息人士向《TV Guia》透露：「約基利斯唔想再同葡萄牙有任何掛勾，尤其佢已經決定唔會再為士砵亭上陣。」

現年27歲嘅約基利斯，效力士砵亭兩季踢102場入97球，包括上季歐聯8場入6球。報道指約基利斯上年答應留效士砵亭，換取今個暑假以不高於7,000萬鎊轉會費離隊「承諾」，但士砵亭會長早前否認有呢個協議，表明唔會平價放人，出爾反爾行為令約基利斯憤怒，威脅罷踢。

約基利斯未夠20歲就被白禮頓收購，但4年間不斷被外借，從未喺英超落場，近兩季喺葡超大爆發後成為當紅炸子雞，成為阿仙奴、曼聯、利物浦、祖雲達斯等豪門目標。消息指約基利斯已同阿仙奴、曼聯緊密接洽，佢首選係加盟阿仙奴，不過如果「兵工廠」轉斟其他目標，約基利斯亦會同意去曼聯再跟魯賓艾摩廉搵食。