利物浦再有猛人加盟　冠軍教頭做施洛副手

英超冠軍利物浦呢個暑假大展拳腳，唔單止有科利安華迪斯、謝利美費林邦同米路斯卻基斯等球星加盟，就連教練團都有猛人加入，曾領軍贏過荷甲冠軍嘅名將雲邦賀斯，周三(2日)正式過檔「紅軍」成為領隊施洛副手，合力為利物浦再創佳績。

現年50歲嘅雲邦賀斯，球員時代效力過阿仙奴同巴塞隆拿等勁旅，代表荷蘭國家隊超過100場，佢退休後轉執教鞭一樣成功，16/17球季帶領飛燕諾贏得荷甲冠軍，21/22球季亦曾帶領格拉斯哥流浪贏蘇盃冠軍，以及打入歐霸盃決賽，期間亦曾執教中超同土超球隊。

雲邦賀斯嘅加入，係取代轉會阿積士做主帥嘅希汀加，但雲邦賀斯嘅教波經驗同履歷比希汀加更勝一籌，相信可以成為施洛得力助手。利物浦同時亦宣布其他教練團變動，包括巴西名將泰法路離隊，佢嘅門將教練位置會由沙維華尼路代替。