巴西前鋒將投森林　捷西斯獲譽「新杜奧巴」

巴甲勁旅保地花高喺世冠盃16強出局，不過表現大獲好評，英超球會諾定咸森林球迷亦非常關注，事關伊戈捷西斯、古亞巴奴同查亞根夏3星，盛傳即將轉會森林，其中射手伊戈捷西斯更被譽為「新杜奧巴」，被睇好喺英超大放異彩。

《The Athletic》早前報道，3位保地花高球星以總值4,000萬鎊轉會費加盟森林，其中伊戈捷西斯就值2,000萬鎊，佢哋加盟將令森林嘅「巴西幫」增加到7人。伊戈捷西斯今屆世冠盃入2球，表現搶鏡。隨住保地花高出局，消息指伊戈捷西斯已準備去做體測，至於古亞巴奴同查亞根夏嘅轉會仍然商討中。

南美足球專家維卡利最近向《Talksport》表示：「伊戈捷西斯係現代版嘅杜奧巴，佢可以一個人孭起成條鋒線，森林可以用佢一個人去進攻，因為你想前鋒做到嘅事，伊戈捷西斯都可以做晒。你想佢做柱躉又得、引球突破又得、走位入楔又得，留喺禁區等機會或者墮後幫手都冇問題，一個超級全面嘅球員！」