女子歐國盃悼念祖達　葡萄牙吞西班牙5蛋

周五(4日)凌晨女子歐國盃B組，葡萄牙女足以0比5慘敗西班牙女足腳下，兩隊同入場球迷都為周四(3日)車禍身亡嘅葡萄牙球星迪亞高祖達哀悼。葡萄牙女足前鋒謝絲卡施華指球員都懷住沉重心情去比賽，而曾經同祖達共事嘅主帥尼圖，就話祖達一直關注同支持葡萄牙女足發展。

今場大批球迷拎住悼念祖達嘅海報同相片入場，兩隊球員臂纏黑紗，賽前舉行哀悼儀式，並喺開波前進行默哀。兩隊實力畢竟有差距，西班牙女足上半場已連入4球，星級球員佩泰娜絲亦有進帳，最終大勝5比0完場，展示爭冠實力。

葡萄牙女足前鋒謝絲卡施華賽後表示：「今日比賽真係好辛苦，因為生命比起足球、比起比賽重要太多，所有人都好傷心，我哋懷住非常沉重嘅心情落場。」領隊尼圖亦表示：「我想借呢個機會向祖達表達敬意，我喺U19做助教嗰陣祖達都喺度，之後亦一直保持聯絡，每次同佢傾偈，佢都知道晒女子隊嘅賽事、球員，因為佢好愛葡萄牙呢個國家。今日係好傷感嘅日子，我哋失去2條寶貴嘅生命。」