紐卡素天價搶購艾蘭加　曼聯揼心口

根據「轉會權威」記者羅曼諾(Fabrizio Romano)爆料，紐卡素計劃以5,500萬鎊(約5.9億港元)收購諾定咸森林翼鋒安東尼艾蘭加，比佢2年前由曼聯轉投森林嘅轉會費多4,000萬鎊，紅魔鬼管理層見到呢位23歲瑞典國腳身價狂升，肯定揼心口。

曼聯2023年7月以1,500萬鎊將安東尼艾蘭加「賤賣」畀諾定咸森林，呢位新星大踢爭氣波，近2季為森林上陣82場入11球及21次助攻，因而獲得英超「新土豪」紐卡素垂青，願意以5,500萬鎊將佢收歸旗下。據悉森林已初步同意交易，紐卡素接近同艾蘭加達成個人待遇條款。

如果以呢個價錢成交，曼聯可以分到800萬鎊「2次轉會分紅」，森林短短2年從艾蘭加身上賺3,200萬鎊，成為大贏家。

由於安東尼艾蘭加同紐卡素首席射手阿歷山大伊沙克屬於瑞典國家隊隊友，兩人早已建立默契，有助佢迅速融入球隊。