祖記簽加拿大射手　華荷域「玩嘢」攬炒

意甲勁旅祖雲達斯即將射入加拿大射手約拿芬大衛，意味將加快出售前鋒杜辛華荷域，但呢位25歲塞爾維亞國腳拒絕離隊，因為想等到明夏約滿，以自由身走人，博取新球會開出高薪合約。

約拿芬大衛效力里爾5年，上陣232場入109球，屬於呢支法甲球隊史上入波第3多嘅球員，佢今夏約滿，同意加盟祖雲達斯。呢位25歲加拿大國腳將前往意大利接受體測，如無意外，雙方將簽約5年。

約拿芬大衛加盟之後，祖雲達斯可以放心出售杜辛華荷域，但佢卻想留隊至明夏約滿，屆時其他球隊唔需要任何轉會費就可以簽入呢位猛將，自然願意開出更高薪酬吸引華荷域加盟。

據悉祖記擔心明夏人財兩失，可能威脅新一季「雪藏」杜辛華荷域，逼使佢接受今夏轉會安排，盛傳曼聯、阿仙奴都有興趣接貨。