對手「送禮」擺烏龍　車路士有運晉級4強

周六(5日)早上世冠盃8強，車路士踢到比賽末段，靠對手「送禮」擺烏龍，以2比1險勝彭美拉斯，晉級4強，將同另1支巴西球隊富明尼斯爭入決賽。彭美拉斯18歲新星艾斯迪華奧今仗窄角度射入1球展現身價，佢將於賽事完結後，正式加盟車路士，相信已成功令車仔主帥馬利斯卡留下深刻印象，新一季上「車」有運行。

雙方曾於2022年「舊版」世冠盃決賽交鋒，該仗車路士踢到加時贏2比1奪冠，呢支英超豪門今場先下手為強，開賽16分鐘由高爾彭馬射入打開紀錄。彭美拉斯下半場初段扳平，艾斯迪華奧喺禁區右路近底線位置起腳破網，技驚四座。

車路士之後加強攻勢，但往往失之交臂，直至83分鐘，文路古士圖左路傳中，彭美拉斯後衞奧斯甸基亞出腳攔截，令皮球稍為改變方向，再省中門將韋華頓入網，官方計入韋華頓擺烏龍，車路士就憑呢個幸運入波晉級4強。不過，新加盟車路士嘅利安戴納，今場一個被車仔球迷評為「無謂犯規」攞黃牌，搞到累積2黃，4強鬥富明尼斯要停賽。

雖然彭美拉斯輸波，但艾斯迪華奧仍然成為主角，車路士上年6月以3,400萬歐元(約3.1億港元)「預購」呢位巴西新星，但等佢今年4月24日年滿18歲，先至可以正式加盟。呢位「新尼馬」今仗變相為彭美拉斯踢告別戰，射入「未來老細」大門，別具意義，新一季登陸英超，表現令人期待。