普捷天奴有先見之明　搶走墨西哥人才

美國上場美洲金盃4強以2比1擊敗危地馬拉，迪亞高路拿梅開二度，演出光芒四射，呢位21歲翼鋒擁有墨西哥血統，上年幾乎選擇代表墨西哥，幸好美國主帥普捷天奴有先見之明，及時徵召路拿，成功搶人才，否則美國能否打入決賽，實屬未知之數。

迪亞高路拿喺美國加州出世，效力美職球隊皇家鹽湖城，由於父母係墨西哥人，佢曾有權選擇代表美國或者墨西哥，呢位新星上年夏天拒絕為美國出戰奧運男足，更揚言唔排除為墨西哥披甲。

普捷天奴上年9月成為美國國家隊主帥後，希望為球隊注入新血，今年1月徵召迪亞高路拿，對佢委以重任，果然有回報。迪亞高路拿今屆美洲金盃已有3球進帳，並且都係淘汰賽階段射入，成為晉級決賽大功臣。

迪亞高路拿對於決賽「倒戈」墨西哥，抱有興奮心情：「感覺非常特別，我要踢出最佳水準，相信到時一定係精彩大戰。」迪亞高路拿能否連續3場美洲金盃入波，大家拭目以待。