【告別祖達】C朗缺席遭非議　英媒指避免搶Fo

迪亞高祖達與弟弟安德烈日前意外身亡，並於周六（5日）在家鄉舉行葬禮，但身為葡萄牙隊長嘅C朗，竟然缺席，被葡國傳媒大肆批評。

前幾日祖達逝世消息傳出後，C朗都有在社交網發表激動悼文，可見兩人情如手足。來到周六喪禮，除咗迪亞高祖達一班利物浦隊友有來之外，一眾葡萄牙國腳如般奴費南迪斯、貝拿度施華，甚至啱啱先喺美國踢完世冠盃嘅魯賓尼維斯都趕來送別，偏偏葡萄牙巨星C朗竟然no show，實在講唔通，有傳媒指C朗正同家人喺西班牙馬略卡島度假。

葡國傳媒猛烈抨擊，有記者喺祖達葬禮直播時，於電視觀眾面前直言：「如果C朗唔出席，佢係有責任好好解釋清楚，因為佢係葡萄牙隊長。」

反而英國傳媒為C朗護航，指出今次缺席，係佢怕來到會搶咗風頭，因為焦點應該放番喺祖達兄弟身上，為表尊重，佢寧願唔嚟。