基爾獲加轉投般尼　同囝囝做「隊友」

曼城老將基爾獲加早前被列入「清洗名單」，幾經波折之後，終於有球會收留，英超新升班球隊般尼於周六（5日）落實簽入呢位35歲英格蘭右後衞。基爾獲加嘅囝囝踢緊般尼青年軍，兩父子變相成為「隊友」。

基爾獲加已經同曼城領隊哥迪奧拿決裂，今年1月底被外借去AC米蘭，但表現未如理想，呢支意甲勁旅拒絕買斷佢，早前傳出愛華頓有意簽入基爾獲加，現時被般尼截胡。

基爾獲加已經通過體測，並簽約2年，轉會費因應成績而定，如果基爾獲加新一季可以為般尼上陣超過70%賽事，並協助球隊護級成功，曼城最多可以收到500萬鎊(約5,360萬港元)。

基爾獲加2017年由熱刺加盟曼城，當時轉會費高達5,000萬鎊，佢協助「藍月亮」奪得6次英超、2次英足盃、4次英聯盃及1次歐聯等多項冠軍。