艾納斯大諗頭　要買晒巴西雙雄

艾納斯又準備大灑金錢增兵，根據英國《太陽報》爆料，呢支沙特阿拉伯豪門計劃收購2位巴西國腳，包括皇馬前鋒洛迪高高斯及阿仙奴翼鋒加比爾馬天尼利，輔助C朗下季衝冠軍。

洛迪高高斯想離隊已經係公開嘅秘密，皇馬上場世冠盃8強對多蒙特，呢位24歲射手等到86分鐘先至入替，已連4場屈居後備，可見佢並唔得新教練沙比阿素朗歡心，留隊恐怕冇運行。

艾納斯趁機搶人，已經聯絡洛迪高高斯嘅經理人，商討加盟可能性，估計佢身價達9,000萬歐元(約8.3億港元)，以艾納斯雄厚財力，絕對買得起，但問題係洛迪高高斯是否願意去沙特搵食。

另外，艾納斯亦睇中加比爾馬天尼利，並願意以7,300萬鎊(約7.8億港元)收購呢位24歲球星，如果成事將會成為兵工廠史上最高價出售球員，比原有紀錄2017年以3,500萬鎊賣走阿歷士張伯倫多超過1倍，對於阿仙奴管理層而言，的確非常有吸引力。艾納斯早前同C朗續約後，承諾簽入猛將幫佢手爭標，最終能否兌現，大家拭目以待。