【官宣】車路士再添猛將　「新辛祖」簽約7年

繼祖奧柏度之後，車路士又有新兵加盟，宣布簽入多蒙特翼鋒比諾傑坦斯，總轉會費達到5,200萬鎊(約5.6億港元)，雙方簽約至2032年6月，成為今夏第7位上「車」球員，但呢位20歲英格蘭小國腳唔符合資格為車仔踢今屆世冠盃餘下賽事。

車路士原本希望世冠盃舉行前收購比諾傑坦斯，但拖到近日先至達成交易協議，呢位新星簽約後話：「感覺太美妙，可以加盟車路士呢種大球會，令我無比激動，渴望向隊友學習，並實現自我突破。」比諾傑坦斯總共為多蒙特上陣107場入17球，亦有份為呢支德甲球隊踢今屆世冠盃。

值得一提，比諾傑坦斯出身於曼城青年軍，其後轉投多蒙特，依家登陸英超，足球生涯足跡同曼聯「水貨」查頓辛祖如出一轍，加上兩人都係翼鋒，傑坦斯因而有「新辛祖」之稱，難怪唔少球迷擔心佢踢英超，未必可以發揮應有水準。