耶馬係「紅魔躉」？網民暗寸：曼聯快啲簽佢

巴塞隆拿新星拉明耶馬被譽為「新世代球王」，日前獲得10號球衣，名正言順成為美斯接班人，呢位未夠18歲翼鋒近日度假期間，身穿曼聯波衫同球迷合照，被指係「隱藏魔迷」，唔少網民趁機抽水，呼籲曼聯收購耶馬，球隊就有機會復興。

拉明耶馬自細已經喺巴塞青年軍受訓，但原來擁有1件「復古版」曼聯白色作客球衣，仲着住去旅行，難免令人懷疑佢係紅魔鬼球迷。由於曼聯正在積極物色前鋒，網民建議會方簽入呢位「星級魔迷」，但當中唔少語帶嘲諷，因為耶馬身價不菲，亦無意離隊，更加唔會加盟1支冇份踢歐洲賽嘅球隊，曼聯根本冇可能簽到耶馬。

正因為拉明耶馬加盟曼聯機會微乎其微，所以佢唔需要避忌，可以放心着紅魔鬼波衫出街，都唔怕惹起轉會傳聞。