巴塞神鋒絕殺！挪威女足率先出線

今屆女子歐國盃迅速出現首支出線球隊，周一(7日)凌晨A組賽事，挪威女足憑「巴塞神鋒」卡露蓮漢臣比賽末段入網，以2比1絕殺芬蘭女足，2戰2勝提早取得出線8強席位，盡顯爭標霸氣。

雙方首輪都旗開得勝，今仗交鋒開賽3分鐘，芬蘭女足自亂陣腳，擺烏龍導致落後，亦係挪威女足連續2場獲得對手「送出」烏龍波。不過，芬蘭女足隨即傾力反撲，踢到32分鐘由21歲新星施雲妮絲射入扳平1比1。

其後戰局陷入膠着，卡露蓮漢臣發揮「大家姐」角色，84分鐘攻入致勝1球，呢位30歲翼鋒由2019年開始效力巴塞隆拿至今，協助球隊奪得3次女子歐聯冠軍等多項錦標，見慣大場面，果然喺今場關鍵時刻建奇功。

挪威女足2戰全勝有6分，領先瑞士女足及芬蘭女足3分，由於瑞士同芬蘭將於最後1輪交手，「挪女」已夠分兼對賽成績較佳，肯定以小組首名出線8強。

同組另1場主辦國瑞士女足以2比0擊敗冰島女足，打開勝利之門，同時令2戰2敗嘅冰島女足提早篤定出局。