英超孖寶建奇功　墨西哥成功衞冕美洲金盃

周一(7日)早上美洲金盃決賽，上屆冠軍墨西哥落後之下，憑兩位「英超兵」魯爾占美尼斯、艾臣奧馬艾華利斯各入1球，以2比1反勝主辦國美國，成功衞冕，亦係墨西哥史上第10次奪得美洲金盃，為明年舉行世界盃決賽周壯聲威。

近4屆美洲金盃決賽有3屆由美國對墨西哥，呢兩支歡喜冤家非常熟悉對方踢法，今仗一開波鬥攻，東道主美國先聲奪人，開賽4分鐘就由效力水晶宮嘅中堅基斯李察士接應罰球，勁頂入網打開紀錄。

不過，之後成為墨西哥嘅世界，不斷圍攻美國，並喺26分鐘由魯爾占美尼斯射入扳平，呢位34歲富咸前鋒仿傚日前不幸遇車禍逝世嘅迪亞高祖達，做出「打機」慶祝動作，悼念呢位前狼隊隊友，開賽之前，魯爾占美尼斯亦特別身穿印有祖達姓名嘅20號波衫入場，向佢作最後致敬。

墨西哥得勢不饒人，繼續創造大量攻勢，踢到77分鐘，由韋斯咸中場艾臣奧馬艾華利斯近門頂入反超前2比1。墨西哥近4屆3次捧盃，亦係美洲金盃史上奪冠次數最多嘅球隊，達到10次，比第2位美國多3次。

明年世界盃決賽周將由美國、墨西哥及加拿大合辦，墨西哥以行動證明自己屬於北美真正王者。