睇唔順眼？坦哈格「又」踢走前曼聯門將

德國傳媒報道，今夏由坦哈格執教嘅利華古遜，已同意將捷克門將馬迪積高華賣畀荷甲勁旅燕豪芬，亦係坦哈格2年內，第2度踢走馬迪積高華，似乎佢哋八字唔係好夾！

曼聯青訓出身嘅馬迪積高華，2年前被當時「紅魔」領隊坦哈格以500萬歐元賣去利華古遜，雖然只係副選龍門，但近2季各項賽事都上陣32場。隨住坦哈格夏天接掌利華古遜，馬迪積高華竟再次被踢走。

德國《踢球者》報道，利華古遜同意燕豪芬收購馬迪積高華，轉會費約700萬歐元，意味呢位25歲門將2年內第2次被坦哈格賣走。利華古遜上月已向賓福特簽入荷蘭門將菲利根，馬迪積高華留隊都冇運行。