艾摩廉反對有效　曼聯拒天價拍攝紀錄片

著名足球紀錄片系列《All or Nothing》，過去拍過曼城、熱刺同阿仙奴都大獲好評，據報佢哋早前秘密同曼聯斟介，希望以破系列紀錄嘅1,000萬鎊，拍攝曼聯25/26球季嘅紀錄片，不過領隊魯賓艾摩廉極力反對，消息指拍攝計劃已經拉倒。

據《The Athletic》報道，亞馬遜(Amazon)同曼聯喺幾個月前已密斟拍攝《All or Nothing》，行政總裁貝拉達積極推動呢次合作，1,000萬鎊酬金對財政麻麻嘅曼聯亦非常吸引，亞馬遜方面就深信曼聯紀錄片必定會爆紅，所以願意出天價拍攝。

不過曼聯若答應拍攝，攝製隊會幾乎全天候跟進球隊每場比賽、每課操練，包括更衣室內安裝鏡頭，全個球季發生嘅任何細節都會被收錄，對於經常出現「更衣室事故」嘅曼聯，無疑係一大炸彈，所以艾摩廉就極力反對，唔希望喺咁重要嘅一季受到任何干擾。

報道指艾摩廉嘅堅持最終有效，老闆拉特克利夫同意將拍攝談判拉倒，顯示球會對呢位葡萄牙領隊100%支持。唔少網民都讚曼聯做法正確：「曼聯終於做咗件正確嘅事」、「感恩，唔想全世界睇到曼聯打護級戰嘅情況」。